港聞

【齊昕摑母】梁唐青儀回應全文 強調齊昕「無辜」 (17:06)

特首梁振英女兒梁齊昕日前連續掌摑其母梁唐青儀一幕,引起全城關注。梁唐青儀今午出席活動時,提到當晚事件,強調齊昕是好善良的「細路女」,「係無辜嘅」,又呼籲傳媒給予她空間。

梁唐青儀回應事件全文:

梁唐青儀:

齊昕係一個好好心地,佢真係一個好善良,好鍾意動物嘅細路女嚟架啫,佢好保護朋友,亦都好關心佢嘅朋友。

嗰晚佢同幾個朋友喺一間餐廳到慶祝萬聖節,佢係……離開嗰陣時佢朋友想叫架車返屋企,但係當佢朋友行出餐廳門口嗰陣時呢,其實係有四、五十個記者圍住,蜂擁上去影相,佢哋根本係截車都截唔到,係佢朋友呢,打電話叫我搵架車落去接走佢哋。

我想話畀大家知,當我架車去到嗰陣時呢,個場面係混亂過你哋依家幾倍,係有四、五十個人圍住我架車,跟住仲有你哋嘅朋友,傳媒嘅朋友,係拉開我車門想衝上我架車度。齊昕喺佢朋友攙扶底下想上車,跟住亦都係你哋嘅朋友四、五十人,湧埋嚟圍住佢,中間過程係有啲推撞,齊昕係好想保護佢朋友,佢唔想畀你哋影到佢朋友。

我相信亦都深信嗰晚佢係有啲飲醉酒,佢嗰晚嘅行為呢,係絕對唔會想冒犯任何人,而事後有啲傳媒報紙報道,當晚有啲粗口講過啲乜嘢,我喺現場,我係聽唔到。

我喺呢度想呼籲大家傳媒嘅朋友,請你哋畀啲空間畀佢。我想講,無論傳媒朋友、甚至乎網上朋友,無論你哋對依家嘅現狀、對依家嘅政制有幾咁唔滿意都好,齊昕係無辜嘅,更加唔關佢朋友事,請你哋以後喺佢嘅活動,尤其是佢私人嘅活動嘅情況底下,唔好騷擾佢,佢嘅情緒係需要……需要休養,ok?請你哋畀啲空間佢,多謝大家。多謝大家。

記者:

咁但係佢打你呢……

梁唐青儀:

頭先講過喇,(齊昕)飲醉酒,嗰晚係好混亂,比你哋依家混亂幾十倍,中間過程係有推撞,佢一切嘅行為舉止,當晚係無意、絕對無意、我深信佢係無意冒犯任何人,ok?多謝大家。

掌握最新消息,請Like「明報即時新聞」fb專頁! http://www.facebook.com/mingpaoinews

【媽媽開腔!】梁太:知道社會上不少人對政府有不滿,但女兒都是無辜,強調齊昕現時最需要時休養及空間.....詳情:http://bit.ly/1P5oMu1【齊昕凌晨IG發帖講心聲】http://bit.ly/1P5oRxK【未回...

Posted by 明報即時新聞 on Monday, November 2, 2015

相關字詞﹕齊昕摑母 編輯推介

上 / 下一篇新聞