港聞

無綫何永康「調職」 黃潔慧:他選擇了誠實  (13:00)

無綫新聞部日前突然把助理採訪主任何永康調離編採崗位,商台節目前主持黃潔慧在臉書撰文,形容何永康在新聞專業當前選擇了誠實,「那是崇高的選擇」。

黃潔慧表示,七警涉毆示威者當晚,決定報道「拳打腳踢」的副採主何永康被「調職」。但看在行內人眼裡,明明白白就係降職。她表示,曾與何永康共事多年,形容他是一個處事深思熟慮的人,「當好多人戥佢唔抵,覺得佢好慘時,我對阿康不是同情,而是尊重。同情,只適用於弱者。為做對一件事不計較付出代價,怎麼算是弱者?那是崇高的選擇」。

以下為黃潔慧在臉書所撰寫的文章全文﹕

七警涉毆示威者當晚,決定報道「拳打腳踢」的副採主何永康被「調職」。但看在行內人眼裡,明明白白就係降職。

有睇開有線的朋友大概仲有印象,何永康在加入TVB之前,做左好多年有線,所以,我其實同佢做左好多年同事。佢究竟係個咩野人?從佢的外號就好清楚。我地係叫佢康爸爸。當之不過細佢幾年的我,仲係有百般事情睇唔過眼,仲係好容易上火的時候,康爸爸就係永遠一副老成持重以及氣定神閒咁款,同你慢慢傾。就好似一個語重心長的爸爸。或者一個誨人不倦的輔導主任。當我地七嘴八舌呻有線好多工夫時,一樣做到死的康爸爸,通常都係靜靜地嘆一口氣,插一兩句嘴就算;一round吐苦水咖啡之後,還是回到崗位默默耕耘。記得佢去TVB之前,我講笑問佢:明知山有虎,偏向虎山行?當時,康爸爸答我一句我印象至深的話:只要做好自己本份就得啦。

所以,而家,對佢來講,亦只不過係做好本份而已,雖然,呢個本份,係要付出被調職的代價。但我相信對於一個咁老成的人來說,當佢決定反駁高層,要相信自己對眼,要信同事的時候,佢絕對唔係衝口而出,而係深思熟慮的反應。佢應該預計左可能有咩後果。所以,我可以想像,佢而家應該好平靜。

記者都係人,而且,不幸地,多數係窮中產。尤其是對於阿康呢類超負責任的爸爸來說,一言一行唔會冇諗過老婆仔女。但新聞專業當前,佢選擇了誠實。因此,當好多人戥佢唔抵,覺得佢好慘時,我對阿康不是同情,而是尊重。同情,只適用於弱者。為做對一件事不計較付出代價,怎麼算是弱者?那是崇高的選擇。

我寫呢篇文,冇知會康爸爸,佢或者會怪我太高調都唔定。你知啦佢始終係唔聲唔聲的nice guy。但我是有感而發。當近年香港的記者出去採訪經常受到唾罵,公眾將對傳統媒體的不信任發泄在前線身上(因為公眾只會見到前線,真正揸大旗的老細唔會見人架嘛),其實,仲有好多好多記者,好努力地,在公眾睇唔到的情況下,做好佢地份工。佢地唔係靚女主播,唔會不時上網check下自己人氣,佢地只係求「做好自己本份就得」。

何永康是其中之一。但肯定,唔係唯一。讓我向每一個每一日唔理有冇人鬧或者老細係咪喜歡都做好自己本份的行家致敬。

(綜合)

 

相關字詞﹕編輯推介 政改與佔中

上 / 下一篇新聞