港聞

【短片】警隊男神:無諗過俾啖水咁多人like (18:30)

稱是學習其他警員 感謝學生撐傘為他擋雨

較早前網上瘋傳一段警員借水給佔領者飲的短片,警員從腰間抽出水樽遞給示威者,並笑說「留番啲比我啊」,獲網民大讚「警隊男神」,該警員在fb回應事件,稱「無諗過俾啖水咁多人like」。

網友Siu Maggie早前在fb上分享這段短片,片段中佔領者表示自己口渴,問有否水喝,該警員就從腰間抽出水樽遞給示威者,網民大讚他是「警隊男神」。片段中警員冷靜地勸導佔領者向後行,離開行車路的範圍,「慢慢行番入去,唔好撞」,他又表示「大家都係香港人,唔好咁樣,好唔好?」

網民Siu Maggie留言大讚,「當有暴力事件發生,有位啊sir仍然好冷靜呼籲示威者『慢慢行』『慢慢行』...有位示威者想飲啖水,佢依然風趣幽默地搞個gag。」網民指該名警員姓任,編號9043,紛紛表示要表揚該名警員,廣傳影片,讓愛感染身邊更多人。

「警隊男神」在fb回應事件,他表示記得網友Siu Maggie,多謝他的支持,又表示從沒想過分享水會獲大讚,強調其他警員也曾這樣做,只是沒有獲廣泛報道,沒有人like,以下是他在fb的回應全文:

俾咁多人讚,我都有啲唔好意思,我記得你啦,siu maggie,你嗰日都帶住你嘅googleglass企响後面。多謝你嘅支持。

我無諗過俾啖水會有咁多人like,但由此不難想像警察同示威者之間嘅對立與偏見。

希望大家唔好衝動,示威還示威,衝擊時知進退,為免受傷,見到警察舉紅旗時,好退啦,受傷無意思。

我喺佔中開頭幾日,我都好氣憤,好沮喪,一向有秩序嘅街道俾人霸佔,當我做嘢時,啱到場,咩都無講無做,就俾人衝撞同辱罵,人都癲。好多同事都感同身受。非常唔開心。我收工都會去彌敦旺角道去諗下究竟咩料,我應該點去應付。經過數日接觸,我才能調校返心態。

可能時間同空間都需要多啲。我估中央政府其實亦面對緊同樣處境。始終,一個國家,仲要係一個大嘅國家,處理呢啲敏感嘅事件,要好小心。無人會想演變成英格蘭同蘇格蘭咁嘅分裂(我指內地)事件。到時香港一定不會獨善其身。好似講遠咗。

身邊好多同事睇返大家對我嘅支持都好開心,不單止為我,也因為佢哋自己。話說,我俾啖水你飲,都係從另一些師兄弟上學返嚟。也是感謝返從上次個學生哥仔幫我用傘遮雨。

雖然警察依家唔使冒槍林彈雨,但其實要維持返社會秩序,呢份工作唔容易。

希望示威人士睇到我哋舉紅旗時,要識進退,一味死衝,好易受傷。

政府其實都難做,但如果做得好,亦嘗試讚下,因為我發現政府好少會有人讚,佢哋工作更具挑戰,如果佢哋受到表揚,相信做嘢會有Heart啲呢!

在此,對想加我fb嘅朋友說聲抱歉,因為人太多啦。你哋嘅支持,我哋收到晒。多謝各位

(即時新聞)

相關字詞﹕編輯推介 政改與佔中

上 / 下一篇新聞