文摘

【贏在射精前?】子宮裏就鬥輸贏? (文:山地媽) (17:09)

CCTVB節目爆了金句「贏在射精前」、「贏在子宮裏」,呢兩句soundbite真係正到暈。響個子宮度點鬥法、點贏法?怪獸媽有怪獸媽的戰略,山地媽也有山地媽的戰略,寫低畀大家笑下,順便厚面皮地曬冷翻兜下過往相關親子文章。

其他文章:休學優學:「優學年」成就了什麼?(文:何美儀、趙永佳)

【鬥子宮】

怪獸媽玩法:計排卵期務求生一月大B贏在子宮裏,今個月搞唔大個肚就明年請早(不過小心等到更年期都生唔出)

山地媽玩法:有仔趁嫩生,最young最fit時馱BB,母子病痛都冇咁多

延伸閱讀: 幼稚園行情直擊:起跑線上分勝負,出生月份有玄機

【鬥射精】

怪獸媽玩法:「老公,而家射生唔到一月B呀,等下先!」(不過生仔最忌有壓力,射到唔等於游得遠,游得到唔等於著到牀,著到牀唔等於馱得穩…… 重點係咁搞法恐怕老公好快就會去滾)

山地媽玩法:兩公婆食好睡好無壓力,精神好身體好,幾時生得到就幾時生得到。成日諗住計住,「今晚唔射/今晚射唔中就生唔到一月B」,好大壓力、好痛苦架。話射就射,你估係局長射波咩,要講情調同心情嘛。要咁樣生仔法,真係要lie back and think of England先掂……

延伸閱讀:名校之路:起跑線必贏策略

【鬥奶(飲那種)】

怪獸媽玩法:唔可以買cheap嘢咁輸蝕,梗係要買有齊AA、DHA、PHD、TVB、LOL、WTF、七大膳食小那媽……的奶粉,食到個仔個腦勁過PHD、腸胃暢順過上海迪迪尼Winnie the Poo啦。(不過此等成分唔知由乜東東提煉出來,諗起就毛管戙)

山地媽玩法:媽媽奶,講完。

【鬥語文】

怪獸媽玩法:朝早同仔女講(半桶水)普通話、播喜洋洋,夜晚同仔女講(半桶水)英文、播迪迪尼美語,星期六日去學下西班牙文,或者趁一帶一路熱潮學下阿拉伯文(不過小心大個連用一個語文講一句完整句子都搞唔掂)

山地媽玩法:朝早夜晚都係講廣!東!話!如果仔女聽唔明阿媽講「乜你咁水皮」、「抵你拍烏蠅」,阿媽會好痛苦。

延伸閱讀:

英文叻,真係咁巴閉?(上)

英文叻,真係咁巴閉?(下)

教仔只英不中 有如自斷一臂

小孩興趣班:沒有最騎呢,只有更騎呢

【鬥幼稚園】

怪獸媽玩法:屯門最hit那間幼稚園只收一月B,所以一定要生個一月B!(其實你唔識出去九龍塘搵幼稚園的嗎……屈響屯門實在太委屈你嘛……)

山地媽玩法:反正自己湊,幼稚園呢家嘢讀唔讀都好閒,志在學下群體生活、待人接物。揀間近屋企同有愛心就好。

延伸閱讀:

鬼港幼稚園面試見聞錄(上)

鬼港幼稚園面試見聞錄(下)

其他文章:世紀.快樂父親節:專訪黃鎮昌:不一樣的爸爸(文:何曉瞳)

【鬥課外活動】

怪獸媽玩法:星期一至日排到滿一滿,游水芭蕾公文數劍橋英文phonics鋼琴小提琴樣樣齊,唔報翻咁上下多樣點夠競爭力入喇沙瑪利諾?(介紹返:其實喇沙瑪利諾都係津校,近半家庭係循世襲途徑入讀,另外一半係搬入個校網填表攪珠入的,只有極少數係靠「實力」叩門而入,港豬父母唔該搞清楚)

山地媽玩法:行山、堆沙、種花、去遊樂場。細路哥郁動下放下電緊要過坐定定學公文數呀朋友。

延伸閱讀:

幼稚園生也補習?

Kumon公文式:每週200頁功課的幼稚園補習

爸媽太虎,孩子太苦

【鬥小學】

怪獸媽玩法:唔可以輸畀人,一定要入名校,即是拔萃協恩聖保羅、德望英華陳守仁,幾遠幾貴都要入,還要去好多個面試班、參加好多個比賽、做個完美portfolio,務求入到。

山地媽玩法:上述學校一律唔會報,因為三個字:普教中。同幼稚園一樣,小學揀間近屋企,慳返搭校車時間去玩同睇書好過。

延伸閱讀:

面試兵團小逃兵

比賽第二,得獎第一

仔女坐校車,阿媽心慌慌

【鬥普教中】

怪獸媽玩法:多數名校都普教中,當然要好好迎合同裝備小朋友,平時同仔女用唔鹹唔淡爛到嘔的普通話交談。射精都計準到一月生B,普教中有乜難度?

山地媽玩法:口語講好廣東話,書寫寫好中文字,要學講普通話有幾難?放過小朋友啦好心,央視style的普通話歌仔童謠真係惡頂到我毛管戙呀……

延伸閱讀:

普教中,官校慢推,耶校搶住推

致全港校長:普教中,你良心過得去嗎?

【鬥TSA】

怪獸媽玩法:唔好理TSA係乜,總之有試就考好佢,一定要贏,由子宮贏到TSA。學校派TSA練習都唔夠,書展買一大袋返屋企繼續慢慢做。

山地媽玩法:為捍衛仔女休息玩耍時間,打算拒買拒做TSA練習,見一本殺一本。反正教育局發放全港學校校長張通告明文指出:「學校無須單為了應付TSA而改變教學及評估方法,也不應使用着重操練的補充練習及/或應試練習。這方式只會扼殺學生的學習興趣,對學生的學習進展亦無裨益 。」

延伸閱讀:

少時TSA,老來新東方

自己個仔的TSA自己避

睇到呢度,覺得山地媽輸了九條街?唔緊要啦,人生根本不是短跑賽,也不是馬拉松。贏在起跑線呢個比喻係用來呃家長科水架咋,邊有得咁樣分輸贏?上文純為博看倌一笑,大家唔好咁認真喇。

(原文載於作者網誌。文章為作者觀點,不代表《明報》立場)

其他文章:《啪上雲霄》 男女性趣係咩玩法?(文:皮亞)

其他文章:法式考卷:法國高考哲學科演繹課三:工作即「搵食」?(文:劉況)

相關字詞﹕文摘 編輯推介 贏在射精前 贏在子宮裏

上 / 下一篇新聞