全國政協同人大會議分別將於下月4號同5號喺北京開幕，工聯會嘅港區全國人大代表同全國政協委員今日提出17項提案同建議，包括允許香港政府喺大灣區內地城市買樓，用嚟做公屋，認為可以解決香港基層市民嘅住屋困難，亦可以推動大灣區融合。
港區全國人大代表、工聯會會長吳秋北話，香港熟地少，興建公屋嘅建築成本高昂，租金亦貴，以「簡約公屋」為例，推算每個單位每月管理費要2450元，同一價錢，喺東莞、佛山等部分大灣區城市，例已經可以租到三房單位，面積最細都有700呎，所以建議容許港府「整體購買內地大灣區城市閒置商品房作為香港公屋」。
工聯會理事長黃國就話，隨住大灣區城市融合發展，越嚟越多港人返內地投資置業，但就衍生咗買樓嘅矛盾，例如樓花項目爛尾、發展商誇張失實虛假宣傳等，所以佢建議做好港人喺內地置業嘅銷售規管同宣傳教育。佢又希望解決兩地政府文書互認問題，令出世紙、死亡證同「寡佬證」等可以喺兩地都受認可。
工聯會嘅其他建議仲包括，統一兩地驗車及保險整合標準、喺香港設立「廣東省民生事務一站通綜合服務中心」、放寬商用車輛司機駕駛證續證上限年齡至65歲、喺港深口岸區域設立港式服務綜合牙科醫院等。