創科線

即時港聞

下一篇
上一篇

【Emily Online】數碼港資助港電競手赴韓國受訓

數碼港首次透過「電競行業支援計劃」,資助香港「英雄聯盟」電競選手去海外受訓,參加由韓國職業電子競技協會(KeSPA)同韓國蔚山首次合辦嘅「2019 KeSPA環球電競訓練營」,學習競技戰術、加強團隊合作意識、提升電競職業技能,同亞洲地區高手切磋。

呢個訓練營唔少嘢,12月14至18日一連5日喺蔚山舉行,除香港嘅戰隊,仲有韓國同台灣等其他7隊電競戰隊,一共50名選手參加。香港戰隊一行12人,包括早前勇闖英雄聯盟世界賽16強嘅「香港態度」(HKA)同本地女子電競團「電兔88」,兩隊派出教練隨團參加教練課程。參加訓練嘅「電兔88」選手Fuyu話:「今次訓練營非常有啓發性,能夠同韓國T1同HKA等專業戰隊對戰,係十分寶貴經驗。」

KeSPA由韓國政府成立,專責推動國家電子競技發展,係韓國奧林匹克委員會同國際電子競技聯合會嘅成員。訓練營請咗韓國頂級電競高手授課,由英雄聯盟韓國冠軍聯賽(LCK)專業電競戰隊DragonX教練團同韓國體育大學講師,聯同KeSPA代表擔任導師,分別為選手、教練進行系統培訓,針對技術、心理、體能、社交四方面,加强選手視覺控制、裝備選擇、逆境應對、決策力、耐力、溝通等,安排分組兼交換隊員對戰。

數碼港今年4月推出「電競行業支援計劃」,資助電競業界團體舉辦活動,包括電競比賽、培訓、境外交流團等。數碼港亦透過「電競實習支援計劃」資助電競業僱主請實習生。兩項計劃最新一輪現正接受申請,截止申請日期為2020年1月13日,詳情請瀏覽相關網站

相關字詞﹕創科線 數碼港 電競行業支援計劃 編輯推介

上 / 下一篇新聞