放假論被批 吳克儉﹕係講校長角色

【明報專訊】城大冧屋頂咁大件事，教育局梗要跟進，局長吳克儉前日喺研討會度話，本來「諗住放假好舒服」，點知突然有天台倒塌，呢番話惹嚟批評；噚日局長出席立法會回答屋頂倒塌事件嘅緊急質詢 ，一眾議員冇手軟，民主黨黃碧雲批評吳克儉講埋啲涼薄說話，好無恥。工黨李卓人就似乎對教育局嘅跟進措施唔多滿意，話局長雖然冇放假，但睇唔到佢留喺度做咗啲咩緊急措施。