【明報專訊】不時勸學生追夢嘅中大校長沈祖堯，新網誌提到佢上星期去日內瓦擔任國際獎項嘅評審團，令佢大開眼界。沈校長話其他評審成員已經好猛料，有上過3次太空嘅加拿大太空人、贏過4次奧運金牌嘅芬蘭冰上賽選手同智利海洋生物學家等等，數以千計嘅候選人亦唔簡單。沈校長形容大部分候選人都係三四十歲、受過大學教育，但「不以一己之私為先」，甚至離開自己熟悉嘅行業或國家，立志克服困難改變世界。
