吳克儉年度外訪 次數增多 錢使少咗

【明報專訊】教育局噚日向立法會財委會回覆開支預算提問，唔少議員都好關心教育局長吳克儉外訪用咗幾錢，原來佢2015/16年度都「收斂」咗唔少，用咗48.3萬，金額歷年最低，但次數就歷來最多，達13次。吳克儉鍾意去日本私人旅遊就大家都知，但根據2015/16年度嘅工作外訪紀錄，佢就多數去祖國，13次入面有至少9次都係去內地，包括北京、廣州等，大都係與當地官員及學界會面。佢仲有去新加坡出席國際會議，當然唔少得跳出亞洲啦，飛埋美國同比利時。