成功爭取東涌戲院遲兩月收檔

【明報專訊】民生無小事，地區無戲院都好大件事㗎，好似東涌嘅東薈城UA戲院，早前因為商場業主話要重整商舖，搞到戲院同大食代都要4月收檔。呢件事居民都好關注，因為UA執埋，佢哋就要跨區先可以睇戲。區議員當然要跟進，好似工聯會鄧家彪前日就公布，跟商場管理公司傾過，成功爭取戲院可以經營多兩個月咁多！即係商場會畀UA經營到6月上旬。阿彪就梗係話可惜，因為佢希望戲院可以做埋暑假檔期，方便居民。