英御前樂團到校表演 教基層學生

【明報專訊】曾經喺英國威廉王子婚禮中演出嘅倫敦室樂團應垂誼樂社邀請，噚日到循道學校表演，等多啲基層學生享受到音樂。除咗彈奏古典曲目外，佢哋亦用互動形式，向同學仔介紹每件樂器點用，𧨾到佢哋捧腹大笑。表演過後，樂團成員親自指導學校管弦樂團成員，教彈樂器節奏、點與同伴合作等，同學仔都話特別欣賞佢哋專注同活潑嘅風格，仲以佢哋為目標，立志學好音樂。