主張「要本土、不要分離」嘅民建聯立法會議員鍾樹根(樹根),因為被黨拒絕排喺名單首位出選港島,早前講明考慮同民建聯「分離」,不過今日就宣布唔會退黨,仲話「民建聯可以唔要我,但我唔會放棄民建聯」,認真難離難捨。
樹根表示,雖然不滿結果,但仍要放低個人得失,「民建聯入面有我嘅歷史,我嘅歷史亦都有民建聯」,如果唔團結,可能會守唔住立會現有議席,「民建聯無分裂嘅本錢」。
面對英文提問時,樹根亦用佢極具特色嘅英語作答,指自己若排在名單第二位,唔知到底會唔會勝出:「Can it be win?It's uncertain」。
樹根facebook小編「根毛毛」近日喺網上好受歡迎,記者就問樹根點解最近社交網攻勢咁強勁。樹根就答,係因為發現上年區選失利,其中一個原因係放棄咗網上陣地,而網絡對年青人同專業人士都有好大影響,所以佢「作為從事IT行業30幾、40年嘅人」,都希望用新方法吸引支持。
至於被問到會唔會仲覺得自己係瘜肉、擔唔擔心隨時被人割走,樹根就幽默咁答:「就算係瘜肉,都係良性。」
雖然樹根最近當紅,不過佢今次出嚟宣布留黨,網民就唔受落喇。有人留言話要unlike佢個page,又話支持佢參選,但係唔會投票畀佢,更加有人質疑「根哥!你這樣又去又留,你不是在搞分裂嗎?民建聯要不分裂也很難!我十分質疑你的政治智慧!!」
相關字詞﹕鍾樹根 Emily Online 立法會選舉