大律師公會前主席石永泰談及對香港前途看法時說,近一年半載感到「好鬱悶」,因為太多「歪理、妖孽」。他以《十年》奪得香港電影金像獎最佳電影引來諸多批評為例,指電影技術粗糙,但藝術評審是講感覺和主觀,而很多人可能為了「交心」,「講埋晒啲妖孽嘅嘢」。
其他報道:石永泰批旅業界「賴地硬」 指香港景點「娘到内地客都唔嚟」 遊客減無關驅蝗
石永泰接受商台節目《雲常開》訪問,被問到如何看香港前途,他表示,近一年半載「好鬱悶」,太多歪理和妖孽,不知道是否「市之將亡,必有妖孽」,直言有很多妖孽出來說話,甚至是每日都有好多妖孽。
他以講述中港矛盾及港獨議題的獨立電影《十年》奪獎為例,自言看過這部電影,有資格評論。他指這部電影技術粗糙,但認為藝術評審是講感覺和主觀,在某個時空奪獎,是在那一剎扣動到評審的心弦,而不是科學地計分,但很多人可能為了「交心」、保住影業,「講埋晒啲我所謂嘅妖孽嘅嘢」,包括指《十年》「小成本點可以攞(獎),藝術畀政治騎劫,又雲吞麵諸如此類」。
他舉例說,「音樂節很多小朋友表演,有D(小朋友)又混聲合唱、又高難度,有兩個好cute嘅小朋友做好cute嘅動作,好簡單,冇高深技巧,判出嚟cute嗰隊贏咗,有技巧嘅(小朋友)係咪就要鬧?」
他指藝術「冇得拗」,「如果咁唔妥佢(十年),不如你一早話唔應該入(圍)啦」,而不應是電影得獎後才出來諸多批評,難道這班人是心想「做場戲」,即可以讓它進入頭五名,但卻不能讓它贏,「我有資格入頭五,你就預咗我有資格贏架啦。呢啲咪就係妖孽囉!」