立法會內出現一個「新梁營」，佢哋議席數目仲有8票咁多，佢哋今日仲首次聚會食大茶飯！不過，此梁營不同彼梁營，佢哋其實係一班姓梁嘅立法會議員走埋一齊聚餐，純粹風花雪月，避談政治或選舉。
呢個梁營飯局由經民聯梁美芬牽頭，會計界梁繼昌協力聯絡促成。梁美芬話議會內應有8名姓梁議員，大家有不同政治背景，今次除咗公民黨梁家傑及經民聯梁君彥離港及有要務辦，其他6人都賞面參加，大家食吓飯溝通下。
除咗梁美芬同梁繼昌，其他出席者包括社民連梁國雄（長毛）、醫學界梁家騮、街工梁耀忠及民建聯梁志祥。佢哋除咗食飯，仲玩埋簽署出席紀念卡，玩得好認真。梁美芬仲話，席間無同長毛鬧交，飯局氣氛融洽。
相關字詞﹕Emily Online 立法會 編輯推介