行外人好無知咁睇，成日都以為做大律師，打刑事案就最有型，不過身為大律師公會前主席嘅石永泰就話，佢主要係打商業同民事案，唔打刑事案，點解有咁嘅選擇呢？
石永泰接受商台節目《雲常開》訪問時解釋，打商業案收入穩定啲，而且刑事案多數唔會牽涉好多文件，好睇急才，「又冇文件，去到又要盤問證人」，好睇自己係咪兇人哋，佢就直言覺得自己性格唔適合。
佢又提到自己開始執業時好上心，心高氣傲、臉皮薄，覺得畀人當住個客面窒好無面，對自我有少少打擊，尤其是預咗會贏嘅案件，但後來學習到制度下法官唔一定要認同自己所講，當你覺得已經盡力解釋，法官仍唔接受論點，咁就同自己講「我哋嘅制度唔包括會贏」。
佢話，佢呢行就好似的士唔可以拒載咁，唔會因為個人信念而唔接案件，即使客人一嚟到財大氣粗，就算令人反感，但嗰單案情強都會同佢講，但如果單案件案情唔好嘅，就要直接盡責任直接勸佢和解。