即時港聞

【Emily Online】法國波爾多紅酒節周四開鑼 香港館中法小吃香港有得試 (00:07)

星期四就係兩年一度嘅法國波爾多葡萄酒節,香港再獲邀為10個榮譽城市之一,係亞洲唯一上榜城市。旅發局計劃以「中x西」為主題,突出香港中西合璧特色,除咗攤位設計成傳統大戲棚,仲有年輕藝術家與名廚同行。

醉心粵劇嘅王侯偉、譚穎倫同袁善婷將會演出《宴舞醉楊妃》,故事講唐明皇同楊貴妃秋天同遊御花園賞花飲酒,唐明皇請愛妃演唱李白作品《清平調》。

王侯偉話,帝皇情侶本應有太監宮女侍候,但今次遠赴法國帶唔到咁多人,唯有微調,就算台上只有兩個人,都要演到皇家氣派;至於旦角醉酒嘅高難度指定動作──落腰,就當然唔少得。除咗粵劇演出,佢哋會即席教賓客粵劇造手,又會畀人試穿戲服同化粵劇妝。譚穎倫係化妝高手,10分鐘就搞掂一個粵劇妝,非常快手,預計唔使排長龍。佢講笑話,演出時條眉要戚住幾個鐘,賓客雖然頂多「痛一陣」,不過都可以感受吓。

至於舞蹈家胡錦明、何康汶、游家傑則同場演出水袖舞同踢躂舞,兩種截然不同嘅舞蹈,希望帶出古今交融、對酒當歌嘅感覺。

表演之餘,醫肚都好緊要。米芝蓮三星廚師「廚魔」梁經倫(Alvin)、人氣廚師May Chow將分別炮製中法fusion菜。Alvin負責為紅酒節打頭陣,烹調「燒鵝肝配竹葉青酒」,招待「市長午宴」嘅來賓;另外兩道菜「粉絲配黑毛豬火腿」同「紅燒sweetbread」則是「1855晚宴」嘅餐前小食同前菜。

May Chow就設計咗3款小食,結合地道港式食品同法式食材,例如「港式法國多士」,傳統西多士配鵝肝牛油,咸味牛油配甜味糖漿,味道特別。另一款「法式枝竹羊腩煲」將枝竹炸成脆片;同時因應法國人鍾意食他他醬,以創新嘅腐乳沙律醬炮製羊肉,切碎放上枝竹脆片奉客,平日熱辣辣嘅羊腩煲化身「一口小吃」,同樣有趣。May嘅餐廳「Little Bao(小包包)」將會有「7月限定」,兩款小吃連同「橋底辣蟹」,唔使去波爾多都有得食。

其他報道:【Emily Online:父親節】‬工聯會鄧家彪王國興扮大肚講侍產假 網民笑似「肚滿腸肥」

其他報道:迪士尼前員工現職員工裏應外合 偷逾千紀念品六折放售被捕

相關字詞﹕旅發局 法國 葡萄酒節

上 / 下一篇新聞