即時港聞

【Emily Online:父親節】‬工聯會鄧家彪王國興扮大肚講侍產假 網民笑似「肚滿腸肥」 (23:08)

又到咗一年一度爸爸大晒嘅父親節,工聯會區議會議員鄧家彪亦有喺facebook應應節,不過佢就好破格,唔係老老套套講聲父親節快樂就算,而係拉埋黨友王國興齊齊戴上假肚扮大肚婆,寫明「體會不到十級痛,也分享她的願望」,並特別標籤侍產假。

其實王國興上次都同郭偉強在海報宣傳過侍產假,海報中郭偉強抱住BB,王國興就企喺側邊,當時已被網民笑佢哋「hehe忘年戀」,又翻舊帳批評工聯會無投票支持泛民議員提出侍產假增至7天的修正案,認為張海報搵嚟搞。

事實上從網民留言都睇得出今次大家又係鬧多過讚,嬲嬲數多過讚好數量,有網民就取笑二人「完美演繹肚滿腸肥」,有人則搞笑留言話「想問下(吓)佢地(哋)肚裡(裏)面有幾多罐午餐肉?」

更有網民睇完鄧家彪個post,忍唔住問點解工聯會又講侍產假,「我以為人一般嚟講係應該崩口人忌崩口碗,對於一啲醜事或瘡疤係會盡量唔提,但工聯會偏偏三番四次攞嚟自我宣傳⋯究竟係無恥還是白痴?」

Emily覺得,睇嚟工聯會中人都要諗諗計,點樣可以令網民更加認同佢哋嘅心意喇。

其他報道:【中大生急求心】醫生指馬倬朗仍危殆 馬父感激捐心者遺愛:最好的父親節禮物

其他報道:【酷熱天氣】烈日下錄34.2℃ 有紀錄以來最熱父親節

相關字詞﹕編輯推介 侍產假 父親節

上 / 下一篇新聞