教育局局長吳克儉民望屢創新低，噚日港大民意研究計劃最新調查顯示，佢民望淨值由-42%跌到-51%，成為上任以來新低。正所謂民望如浮雲，民望負值無損吳局長被邀出席活動嘅地位同心情，仲係晚宴上成為女藝人林雅詩selfie集郵對象添。
藝人林雅詩噚日去咗會展出席一間集團嘅50周年晚宴，當晚現場都有唔少明星明人出席，好似王祖藍、楊思琦、徐子珊、吳綺莉、羅霖、米雪、朱慧敏、鄭明明博士等等。林雅詩盛裝出席，着咗件紅黑色低胸晚裝，認真明艷照人。佢喺個人fb貼咗同一堆名人合照，第一張「集郵」對象竟然係吳克儉合照，兩人仲相當貼近。吳克儉面露微笑，兩個人睇落都「零毛孔」，唔知係咪用咗「美圖」app呢？
難得同高官合照，但林雅詩的fans似乎唔係好受落，張相有成8個嬲嬲，但只得兩個like同1個勁正，有網民留言話「總之我比嬲嬲豬係唔係（關）詩詩嘅問題，而係詩詩隔離嘅物體」、「張張都好靚，係得一張唔好『吳得掂』」。
其他報道：【Emily Online】德國駐港總領事館fb教用德文講「綁架」 網民問：可唔可以教埋「被失蹤」？
其他報道：【鄺葆賢退出青年新政】鄺fb標籤「#去向係會做真正嘅黃埔西居民#兌現承諾」