港鐵主席馬時亨接受商台節目《雲常開》訪問時，憶述人生過去3次深刻嘅痛哭。
其他報道：國泰A350介紹短片「關公災難」 機師一提「中國」被打斷
馬時亨講到第一次喊，係當年到美國工作，遇到對佢好差嘅韓國籍上司，覺得自己好委屈好可憐同無助，又因為無任何渠道同人講自己嘅感受，所以用眼淚洗臉。
第二次則係為咗同佢感情好深厚嘅舅父。馬時亨舅父、藝人曾志偉嘅爸爸曾啟榮因涉嫌貪污而被通緝，逃到台灣，馬時亨喺節目中分享到，若非舅父接濟，自己連讀書機會都冇，又話舅父對自己嘅關懷唔係錢買得到。馬時亨擔任問責官員期間，曾因身分敏感去唔到舅父喺台灣搞嘅生日會，直至2008年佢終於可以低調過台灣探舅父，當時舅父已經要坐輪椅，馬時亨想到咁多年都冇機會見到佢就激動咁喊咗出嚟。
至於第三次喊就喺佢卸任官職後，正生書院計劃搬到梅窩，但引起部分人反彈，學生被居民鬧「吸毒仔」、「吸毒妹」，令佢好唔開心，佢就致電電台節目，講到自己喺電視新聞見到正生學生喊，佢終於忍唔住喺大氣電波上喊，又話呢個係香港人嘅悲哀，佢形容當時「嗰滴淚係為香港流」。
相關字詞﹕編輯推介