港鐵主席馬時亨今朝喺商台節目重提2002年發生嘅仙股風波，又爆料其下屬當年因為自保諉過於馬時亨，意味自己「食死貓」。雖然件事已經發生14年，不過官場同政界都即時議論紛紛，究竟呢位下屬係邊個？當年又點樣諉過馬主席？
仙股風波其中一個關鍵，就係馬時亨在細價股暴瀉後，一再強調無收過除牌諮詢文件，後來又承認收過文件摘要，令人質疑佢嘅誠信。Emily聽聞，原來事件係另有內情。事緣當年確係有官員負責將港交所提交嘅諮詢文件摘要轉交馬時亨，由於類似文件屬機密性質，理論上要放入紅色封套，再放到局長辦公室內嘅特定文件盤，畀局長過目，但係風波發生後，馬時亨從未睇過相關文件，亦搵唔到呢份文件，而有關官員就死口話已放左，事後雖然印返份副本出黎，而馬時亨亦照直講出事件經過，但市民觀感就係官員講大話，最後局長仲要鞠躬道歉。
不過原來件事仲有下半集，仙股風波發生後幾個月，呢份文件突然係局長間房以外嘅辦公室範圍出現返，仲夾左喺其他唔關事嘅文件夾入面，懷疑有人當初為求自保講大話，亦間接令局長甚至成個政府被質疑，聽聞該名官員當時被投訴誠信有問題，結果之後亦離開咗政府。
翻查當年政府嘅調查報告，相關文件係由財經事務及庫務局長政務助理鄧詠菁送交馬時亨。