自由黨青年團主席李梓敬喺個人facebook專頁發布在立法會就假難民發言的短片,其後以同一個戶口留言讚自己講得好,下款是「田」,相信是自由黨榮譽主席田北俊,但效果卻變成「自己讚自己」,畀網民瘋狂嘲笑,質疑李梓敬係田北俊facebook管理員,想讚自己但唔記得轉戶口,結果鬧出笑話。
自like疑雲上集:【Emily Online】李梓敬化身「田先生」fb自讚講得好 未轉戶口變自like 網民笑爆:精神分裂?
李梓敬接受《明報》電話訪問時透露「自like」真相,原來同網民所估計唔一樣。佢話田北俊先係佢個fb專頁嘅管理員,當時「真‧田少」用手機喺佢個fb專頁留言,讚佢發言講得好,但因為冇轉換管理員身分,結果留言者個名,就變成一樣係「李梓敬 Dominic Lee」。
李梓敬強調「嗰個真係田生嚟,佢想讚我,但因手機版佢係admin,留言後顯示出嚟會show番個一個account名。我自己睇,就知係佢留言。我點會自己咁戇居呀?係都delete咗啦!」
對於畀網民笑足一日,李梓敬好大方話唔緊要,亦唔覺得困擾,認為「提供笑料畀大家笑吓幾好呀」。佢仲好得戚咁話,田少fb有田毛毛管理,佢fb有田少管理,仲威添呀!
相關字詞﹕編輯推介