育有一子三女嘅立法會議員田北辰（田二少）成日會公開講教仔心得，今次佢又喺商台節目《雲常開》大談「怪獸家長」，仲講笑話自己係「半怪獸後來從良」。
田二少話，自己兩個女教育子女嘅方法大不同，一個就係怪獸家長，一個係順其自然，但睇見兩個孫嘅成長，佢直言「對於順其自然果個，我好驚」。佢解釋怪獸家長嗰個孫，未入幼稚園已經「精通」廣東話、英文同普通話，但順其自然嗰個淨係望住你微笑，未能答到問題，「我作為阿公嘅，你話擔唔擔心」，又話如果幼稚園面試時，一個會答問題，一個笑笑口，「你話校長會點取捨丫」。所以佢話，明白怪獸家長點解咁堅持做怪獸家長，因為競爭太厲害。
對於自己又係咪怪獸家長呢？田二少就話，以怪獸家長方式教導頭兩個小朋友，但之後發現「唔係好對路」，佢地承受唔住壓力，所以就慢慢變到順其自然，形容自己「半怪獸後來從良」，佢亦發現「從良後，細嗰兩個係開心啲」。
佢認為「一本天書不能讀到老」，做怪獸家長啱唔啱，完全係睇小朋友係點嘅人，有啲人可以係怪獸家庭下發揮成長，又話假如教錯自己細路，仲慘過咩都唔理佢。