民建聯前主席譚耀宗喺伊利沙伯醫院切耳瘜肉被質疑「打尖」事件後，咁啱食物及衛生局長高永文今日中午就應約出席青年民建聯飯局，同一班青民同參與者傾偈，但有與會者就話，大家席間都無特別傾到「打尖」事件，高局長亦無主動提及，反而有年輕公立醫院醫生參加者向高局長訴苦，話有時前線人員犯咗一啲輕微錯誤，但事件會被放大，所以感到壓力。
其他報道：【王毅罵加國記者】潘小濤反駁：只有港人最知港情况，才對港事務有發言權
高永文今日中午應邀出席青年民建聯舉辦嘅「名人飯局」，青民主席顏汶羽話，局長同年輕參加者分享自己入行經歷，由最前線醫生到管理層，再到現時決策局工作。
飯局中有一個青年係公營醫院醫生，佢同高局長講，而家有時有啲微細同難以避免嘅錯誤，會被放大報道，又話前線年輕醫生壓力好大，問局長可以點處理。
高永文就話，自香港民主化開始，不單醫療，甚至其他範疇都一樣，透明度增加。佢話咁的確會對前線醫護人員造成壓力，而佢自己係由最前線醫生做起，深深明白壓力。不過，高永文話，只有不斷完善優化制度，先可以減少錯誤發生。
顏汶羽話，高局長平易近人，又話雖然大家對醫療同食物安全有好多訴求，但都係建設性建議，而席間無談及特首選舉或者高局長係咪繼續挺特首梁振英。
相關字詞﹕編輯推介