行政長官梁振英(CY)近期密密接受傳媒訪問,有分析就話佢係為出年嘅特首鋪路,做吓公關工作,不過似乎打動唔到市民喎,港大民意研究計劃最新民調就顯示,梁振英嘅民望再創上任以來新低,較5月初跌3.8分,跌至36.2分水平。
相關報道:【Emily Online】梁振英po民建聯區議員合照 fb「朋友」留言斥民建聯挺政府不力 關鍵時刻「倒米」
Emily發現,一個自稱「政府官方」嘅Facebook專頁「梁振英」分享咗一條CY宣布參選特首嘅新聞,呢個得100人讚好嘅專頁,竟然吸到超過400次分享同近7000個「嬲嬲」。而且「嬲嬲數」仲係直線上升,喺朝早11點14分嘅時候,仲係得444個人回應,到中午12時正,已經有超過7000「嬲嬲」,喺Emily寫稿嘅時候,「嬲嬲」仲直線上升緊!
不過其實單新聞係2012年嘅舊聞嚟,唔少網民似乎受騙,紛紛留言話嚇親:「個心離一離」、「Old news is so scary...」、「嚇死人咩」,亦都有網民好醒,知呢單係舊聞「幾多年前呀」,不過一單舊聞都有咁多人有反應,可見大家都好關心梁特首係咪真係參選。
港聞: