民主黨主席劉慧卿嘅節目，噚日就請到行會成員、港大校委會主席李國章做嘉賓，兩人雖然先禮後兵，但都火花四濺。
話說卿姐問到李國章點捍衛院校自主同學術自由，李國章強調自己一定會捍衛，重提當年做中大校長時處理「路祥安事件」做得啱，又問過港大10個校院院長，所有人都話學術自由無問題，如有邊個覺得學術自由受打擊，「你出聲，我同你處理」，卿姐隨即反問：「如果畀李國章打擊，又可以搵邊個？」
卿姐指李國章個名叫沙皇，反映李國章都唔聽意見，李國章就笑言「沙皇畀人斬咗頭」。
李國章其後接受傳媒訪問，被問到卿姐表明唔支持特首梁振英連任，李國章隨即打斷話係咪卿姐支持CY連任，搞到卿姐隨即澄清當然唔支持啦，李國章就話卿姐係要自己選特首，所以唔支持CY，又形容卿姐選乜都得。卿姐就話自己選咗7次直選都贏，又直接叫李國章唔好講廢話，快啲畀記者繼續問。
李國章就未有回應係咪支持CY連任，只係話CY定其他人都無表態話選。
相關字詞﹕編輯推介