鍾樹根以「月是故鄉明」為主題嘅宣傳banner近日頻頻見光，原來佢仲有架宣傳車，準備嚟緊巡迴港島各區。不過未等樹根啟動，架車已被抄牌。
鍾樹根今日下晝請傳媒見證佢「月是故鄉明」宣傳車啟動儀式，不過泊喺立法會門外添美道避車處嘅宣傳車，未開動就被警察抄牌。樹根話係「政治問題」，「上面有好多人打咗十幾次電話去投訴」，不過佢有少少唔忿氣話「呢度又無雙黃線」，引述警員指「人哋打得多，我都要抄，無辦法啦」！
至於張價值320大元嘅「牛肉乾」邊個找數，佢就話「呢個係廣告公司嘅事，唔關我事」。
宣傳車印上大個鍾樹根嘜頭，又有「月是故鄉明」、「要本土不要分離」字樣，車尾有部電視播放唔同宣傳片，嚟緊4個禮拜會巡迴港島各區宣傳。
被問到「月是故鄉明」系列宣傳花費幾多，樹根話分別由民建聯同佢自己畀，至於價錢「係人哋畀一個好特價我哋，暫時要保密」。
鍾樹根話香港社會太撕裂，港獨利用「本土」名義「遮掩分裂行為」，又話全國人大委員長張德江指呢啲「係非法行為」，故佢要「正視聽」，強調「本土」係人之常情，又指宣傳同9月立法會選舉無關。
鍾樹根事後喺facebook上載「牛肉乾」相，表示「未開車就食左張牛肉乾，一早都話左唔夠車位嫁啦…」，並加入hashtag話「樓上D（啲）人真係好小氣（器）」、「係咁俾（被）人投訴」、「政治打壓」，又特地加上心情指自己「覺得很有生產力」。
呢件事原來仲有後續，話說報案人事後見到樹根出fb指有人舉報致被抄牌，即留言稱「民建聯教落：『堵路違法，還路於民』嘛，見到有人堵路，咁梗係要盡好市民責任啦！」他仲表示，「咁都比人話小氣，真係『方丈很小氣』」。