有「學民女神」之稱嘅前學民發言人周庭，獲邀拍攝ViuTV真人騷節目《跟住矛盾去旅行》，男拍檔由劉夢熊換成何君堯，節目今晚播出第二集。ViuTV今日喺facebook上載今集預告，只見周庭同何君堯齊齊換上傳統日式服裝，其中周庭一身和服，加上流利日語，儼如地道日本少女。
片段一開始就見到跪坐嘅何君堯大搞爛Gag，話感覺到「微秋」之感，仲講笑話之後會變成「中秋」及「深秋」，令周庭笑晒。後來有專人向佢哋示範茶道。經過一輪拍攝後，劇組終於叫停，呢個時候一臉正經嘅何君堯，即時放鬆同露出痛苦表情。佢問工作人員這段茶道拍咗幾耐？答案原來係20分鐘，佢即忍不住話：「20分鐘叫你咁屈住，我睇你都係咁先！」
網民睇完預告片，除咗大讚周庭着和服好靚之外，最多人評論何君堯嘅表現，有人笑佢「上一代嘅人真係唔捱得」；亦有人對嘅反應表示理解，「要一把年紀的叔叔跪坐，的確要請大家體諒年紀大骨頭脆關節仲拮喱格勒......」有人就同周庭一樣識欣賞何君堯嘅幽默，仲笑佢「愛在抽筋」添。
相關字詞﹕編輯推介