【訪問王維基】什麼人訪問什麼人﹕如果要為王維基寫一個劇（文﹕黃熙麗） (11:20)

prev next

第一場

時：2016年5月11日下午

地：金鐘某酒店不足二百呎的貴賓房

人：王維基、八十名記者

△數十名記者拿着攝影機、相機，擠在兩呎見方的枱前

△枱上堆滿不同傳媒的咪、錄音筆，有人架起手機直播

△王維基站在咪後，面色繃緊，閃光燈閃過不停

王維基：如果我考慮出嚟競選立法會嘅議員的話，其實我只係得一個目的，我希望藉着我踏入立法會，作為一個立法會議員，我可以聯繫到香港各階層嘅人士，向世界發聲，話畀全世界人聽，我哋香港人，係值得有一個更加誠實嘅特首。

其他文章：康城現場：活地阿倫新作開幕（文：李焯桃）

若香港電視主席王維基果真於六月出戰立法會，這部《選戰》的第一幕劇本，大概就是如此。上星期，陳志雲上午在商台爆出王有意參選，下午他就開記者會說「正考慮」參選立法會，下月初將公布是否出戰，唯一目標是換特首，恰是張德江訪港前夕。旁觀者覺得有心安排，但他笑稱是被陳志雲爆料才臨時開記者會：「你睇間房咁細，啲行家咁逼就知啦！」

時空來到記者會數日後，青衣城商場對開海旁。記者與王維基坐在長椅上談了兩小時。選青衣，因他要求不要再拍港視辦公室，沒新意。商場的咖啡店滿座，他提議坐在海旁。訪問中途下起微雨，就起身找張有上蓋的長椅繼續聊，「落大雨先入返去，頭先經過，有間餐廳無乜人」。着重細節、隨機應變、永遠有Plan B，沒大老闆的架子，卻有種張揚自信，語速極快，記者沒問完問題，他已開始答，問及換特首的困難，直言「對唔住，但我覺得我有能力做到」。這個人，本身已充滿戲劇張力。

翻出其經歴， 1993年成為自由黨創黨黨員，1998年退黨，同年角逐立法會資訊科技界議員，因持加拿大籍放棄出選，但於上兩屆特首選舉高票當選選委，並於2008至2013年任浙江省政協委員。其實，他的社會參與，要追溯到1981年的中文大學學生會。

當年被中學同學何安達（曾蔭權年代特首辦新聞統籌專員）拉「上莊」，擔任第十一屆中大學生會「群育」一職。參與社會之餘，王維基亦善於平衡團體及個人利益。「莊友」陳健民教授以「Marketing奇才」形容他：「以前學生會都比較紅，講關心祖國同學都唔會理，但佢覺得最重要係同同學建立關係，做啲嘢受歡迎。以前我哋只會放中國電影，佢係第一個話要放徐克（的電影），賣好平嘅飛，好多人排隊！以前大學生都看不起流行文化，不會帶入校園的嘛！」

但在康樂活動以外，王維基也試過為反對改學制「四變三」，帶同學躺在校長馬臨的車底，阻止他離開示威現場。同學貼大字報討論校政，他是在大字報上批注的知名評論家。其他「莊友」還有醫管局高層區結成；當屆會長是張結鳳，後來投身傳媒，採訪六四時於北京中槍受傷。

生意人不應從政？

大一時，曾為會務缺席考試，掛了物理科，但坦言有計算過不影響升班才做，「所以我覺得我係一個從頭至尾都係會睇唔同嘢嘅人」。但若從政，與商人利益會否有所衝突？他連珠炮發：「近呢幾日覺得，咁得意嘅你哋，做生意嘅人就好似唔應該從政，做生意嘅人呢，就唔應該關心社會嘅，做生意嘅人呢，就全部都係衰人嚟嘅，嗰啲人呢就係要揸盡呢個社會。」

他說，李嘉誠曾表示後悔自己沒有從政，「我一路都覺得佢講真話嘅，佢一路都係我好respect嘅人，喺呢一兩年『鄧』句咁嘅說話出嚟，我諗都係從心而發。我覺得係因為香港的政制令好多生意人覺得嘥時間，你用時間走進政治制度，又做唔到嘢，無回報。不是說金錢回報，而是改變不到社會，做不到自己想做的」。他解釋，現時立法會不如美國般會形成執政黨，「最多是做七十分之一，喺度發聲，對大部分人來說發聲做乜，我要有權力去改變社會嘛」。一月尾，他接受訪問，說因無法改變社會而放棄選立法會。記者追問，現在以七十分之一的力量換特首，條路咪好崎嶇？他頓了一頓，「細路女，人生的路，條條路都係崎嶇㗎喇！」又憶述創辦城市電訊時，無人覺得他可以參與建設海底電纜由香港經日本去美國。

不想香港重蹈六七暴動

雨傘運動時，他撰文解釋未能應邀為罷課站台，是因肩負三百間商戶的合作包袱。一月受訪，他說過「I am not nobody」，講話會付代價，寧不談政治。「香港有幾多人，把口有志氣而又有行動的？我覺得冇囉！所以，大家乖乖哋啦！」記者多次引述舊訪問，追問改變想法的原因，而哪一家傳媒，哪一位記者，何時做訪問，他都說得出。「那個訪問是在年初一前做的，我星期三（記者會）都有講，如香港社會的發展按過往四年軌迹咁行，嗰個分裂的程度，絕望的程度——現在係去到絕望嘛，啲人。一絕望就無，就同你死過。」

意思是年初一掟磚很絕望？「當你去到某刻，會做啲好激嘅嘢，掟磚？點止掟磚，點可能只係掟磚！（我們永不知道會去到幾盡？）而我好擔心。再唔拉佢落來，其實係會好危險，我唔想香港再重蹈當年六七暴動，我覺得承受唔起，亦唔需要香港來承受，我唔想見到有人死。」就算進入體制，遊戲規則依舊不變。「第一，我考慮中。真的入到，我一定有我的想法。有一啲我的秘密武器又好，game plan又好。」他說花四年進入議會犧牲很大，「我梗係諗咗一啲嘢，嗰啲嘢係可行嘅，做到嘅，會拉到佢落馬嘅，我先至會考慮行呢步」。追問秘密武器是什麼，他就不說話了，抿着嘴，但笑搖頭。「話明秘密武器，點會話畀你聽，講咗就唔係秘密。」

「拉梁下台比以前易」

「花四年就能拉梁振英下台？」「四年？不用，當然係半年就拉佢落台，三月之嘛，最多咪做到六月三十號。（2017年特首選舉將於三月舉行，如梁未能連任，任期將於六月三十日結束）」繞了一圈，「我真係唔可以講（秘密武器），but put it this way，𠵱家同半年前，大家覺得拉佢落台的難度，𠵱家相對係，好似有一絲、一絲的希望」。

王維基做事都有備而來，他研究了無綫二十五部最高收視的劇集，才去挖角請編劇、監製；98年參選立法會，探訪選民摸門釘，會以即影即有相機拍下「到此一遊」照，請來台灣偶像唐禹哲演出港視劇集，知道唐愛滑浪，特意送衝浪板給他。記者好奇，單是旺角一夜，足以令他由叫人「乖乖哋」，到高呼「換特首」？他反問：「哈，點解劉慧卿做記者，做做下記者之後，走去從政你又唔去question佢呢？」

我不死心：「可是你說你是『純潔商人』，同政治無關？」「喺嗰件事上我係個噃，喺公司的角色，as 一個公司的主席，一個chairman或者一個founder，我run個business我就係confine喺嗰度之嘛，咁呢句說話𠵱家都啱㗎，咁但係我有放工時間㗎嘛，我有權，我有放工時間做我……鍾意學攝影又好，鍾意學游水又好做運動員又好，呢個係我自己嘅事嚟。」

其他文章：【張德江訪港】想借沙士領功　在港人傷口灑鹽　（文：呂秉權）

「北京不想事事管」

「嗰件事（港視）有好多background，因為香港人好多時就話，唏大陸咩都管，其實呢，我唔覺得北京咩都想管香港，係呢度啲人成日都覺得自己，好鬼自大。」他說北京要忙着管西藏、疆獨問題，「香港人又覺得，好似以為人哋成日管你，其實人哋唔係囉，要管你嗰個係特首咋」。訪問在17日進行，三天後（20日），他於陳志雲主持的商台節目中表示，得到「可靠消息來源」，相信當時從無綫挖走太多人，無綫高層上京「告狀」致港視失牌。

訪問期間，有老伯認出他，上前說：「我支持你，梁振英搞到香港無啖好食，一於拉佢落來！」王維基笑說多謝。但換走了梁，繼任人也可能推廿三條、國教，可能梁振英只是中央的棋子？他答得斬釘截鐵，神情極肯定：「呢個係你估，我就話畀你聽，你錯嘞！（你覺得唔係？）梗係唔係啦，梗係唔係啦！（點解？）無得解，唔係就唔係啦，邊有得解啫？（咁你都會有你的原因？）我梗係有我嘅認知，話畀你知唔係啦。（可否分享？）分享唔到㗎。」

「等埋發叔」與西環何干？

記者問：「上次的等埋發叔事件，建制派要看西環頭是政治現實，是否換走CY，接任人就不用看西環頭？」「點解你覺得等埋發叔是睇西環頭？（佢哋要一致，而……）要一致，同西環有何關係？一致之嘛，同泛民話要等埋湯家驊先選、等埋阿李卓人先選，咁你話，要等埋李卓人呀，就係美國領事館指使你！就唔make sense，件事完全唔logical喎！」

「有說你是西環派來『鎅』泛民的票？」他大笑：「你問下許智峯驚啲定葉劉驚啲？」他估計，許今屆最少有三萬票。「葉劉只得三萬零二百幾票，你話我鎅邊個吖？」他又反駁，傘兵的選民不會投給他。「換特首真的有用？」「梗係有！」他說，換特首，才能為香港建立好的「制度」，「今日泛民，何秀蘭出嚟都話畀你聽，撤換特首，重啟政改」。自上周記者會後，各方都好奇他為何突然有意參選，重看其經歷，並非無迹可尋，只是其政治立場如何，「劇本」是什麼，是否與前自由黨黨友田北俊提出「換特首」的「開明建制」路線類近？魔童主演的《選戰》接下來的劇情發展，我們拭目以待。

後記﹕王維基的《選戰》

這訪問本是人物專訪，但參選的議題太重要，繞著政治談了太多。其實，若要為王維基寫一個劇，《選戰》應只是其中一個單元，此外還有《電視風雲》和《電訊魔童》等。筆者最喜歡的單元，是《生有限，活無限》。王維基說，中二時已看存在主義哲學家尼采寫的《上帝之死》，「我不相信有靈魂，肉身以外，無一啲嘢other than我這肉身以外存在，這幾十年，短短在這空間裡面就是全部」。曾任城電董事的陳健民教授說，王維基喜歡做實業。訪問中，他多次講「對唔住」，但接下來的一句都不無自滿：「你剛才走路時有沒有留意，有個香港寬頻的『街井』，你係留咗痕迹在地下，（指着對面荃灣華人永遠墳場）我們at the end of the day，大家都係喺嗰度。對唔住，我同你不同，不是因我有錢過你，而是因為有些事情留咗痕，做咗啲嘢留左喺社會度。賺錢大家都要賺，但做到啲嘢的感覺好強。」

■問：黃熙麗，《星期日生活》記者，當過編劇，若晚點轉行，或許就成為港視人。旁觀電視風雲尚未落幕，真人版《選戰》（或許）又將上映。若要為王維基寫一部劇集，不怕情節不夠峰迴路轉，只恐不知鋪排哪一集才是劇情高潮。

■答：王維基，人稱魔童，自言喜歡「搞事」。創辦城市電訊，由引入廉價長途電話，到鋪設寬頻光纖，一再演出「打倒巨人歌利亞」的戲碼。前年香港電視失落免費電視牌，流動廣播制式又不獲港府認可，卻不斷「無限復活」，再接再厲申請發牌，結果未知。最近又「搞事」說有意參選立法會，目標只得一個：「Anyone but CY」。