全國人大委員長張德江今朝會見社會各界人士，發表大約20分鐘演講，其間基本法委員會委員劉迺強身體不適，張德江隨即慰問佢，又叫職員搵張櫈畀佢坐吓。而張德江演講完畢後，絕大部分在場人士都有拍手，唯獨前政務司司長陳方安生雙手交握，並冇拍手。
其他報道：【張德江訪港】訪將軍澳老人院 對面欣明苑現「我要真普選」直幡
張德江今朝喺政總會見200幾位社會各界人士，當佢提到香港經濟發展期間，演講突然中斷，佢嗌「找把椅子」、「很抱歉，我說話長了」、「醫生來一下」，原來係因為佢見到年近70歲嘅劉迺強身體唔舒服。張德江慰問咗劉幾次，又話「我不長說了，大家站着很辛苦」。
最終喺演講尾聲，有人推輪椅送劉迺強離場。張德江問咗幾次「沒問題吧？」、「抱歉讓你多等了」，仲叫在場人士畀啲掌聲劉迺強。
劉迺強其後回應，話自己由於等咗個幾鐘影大合照、企得太耐，啲血上唔到上半身所以見暈，稍作休息已經冇大礙，唔使送院。