全國人大委員長張德江訪港，今晚喺會展舉行晚宴，多名泛民主派議員原獲邀請，惟事前傳出出席者又要填表又要交相，規矩多多，最終不少泛民都拒絕出席。不過，原來呢個晚宴政府新聞處有在網上做直播，即每個市民只要有網絡，都可「近距離參與」呢個難得的宴會。
其他報道：【張德江訪港】葉國謙：保安無帶來困擾 「好似交通好順」
Emily都即刻上網睇睇，畫面幾清偶有起格，鏡頭前出現的不少都是達官貴人，例如全國政協常委胡定旭就同前律政司長黃仁龍傾得好開心，同枱仲有「蘭桂坊之父」盛智文及長和集團副主席李澤鉅，另一邊又見港大校長馬斐森同發展局長陳茂波都相見歡，不過鏡頭後嘅你我，就真係唔知佢哋傾咩嘢，但仍然可以清楚見到佢哋嘅表情同小動作，飲啖果汁都一目了然。
特首梁振英太太唐青儀昨日一襲紅裙搶晒鏡，今日就改以比較柔和嘅粉紫外套現身，佢坐在前特首夫人董太董趙洪娉身旁，與基本法委員會副主任梁愛詩同席，唔知兩任特首夫人會唔會交流吓做特首夫人之道呢？
晚宴前張德江會先同4名泛民議員在酒會會面，喺他出現前，大部分賓客都已坐定定，唔少人仲等到發呆添。
據本報了解，晚宴每張枱上都有溫馨提示，寫住「晚宴進行期間，嘉賓請勿離座祝酒」；另今個晚宴亦無提供鮑參翅肚，據餐單顯示，今晚一沙律一燉湯另有6個菜式，以及甜品和水果拼盤。