張德江2014年6月有份推出《一國兩制白皮書》，在沙士疫情上，有人想領功，以300幾字大書中央點伸出援手，無償優先對港提供防疫物資，領導人來港到重災區慰問，又用自由行同CEPA嚟救香港經濟，皇恩浩蕩，隻字不提廣東隱瞞沙士疫情禍延香港同全球，試圖掩飾自己的過失。
其他文章：【張德江訪港】張德江未到先輸兩仗公關（文：潘小濤）
當年北京隱瞞沙士，最後都有市長孟學農同衛生部長張文康下台謝罪，以息眾怒。廣東（時任省委書記為張德江）呢個係隱瞞同病毒嘅源頭，當時害死香港同大陸咁多人，正一罪魁禍首，到底有邊個負過責任？人哋人命就枉死，你哋就官一樣照升，太陽照常升起，官位愈做愈大，呼風喚雨，八面威風，相信很多人只是看到官職份上。
喺《一國兩制白皮書》入面，沙士呢筆血債可以寫成內地對香港嘅深情厚意，大恩大德，白事變成紅事做，壞事可以變好事，簡直係喺香港人嘅傷口度灑鹽！
包括警察同醫護人員在內的香港人，希望你哋知道而家官方咁大陣仗招待嘅人其實係欠香港人一筆乜嘢嘅債。
***********
以下為白皮書有關的沙士內容：
「支持香港抗擊非典。2003年上半年，非典疫情肆虐香港，不僅危及香港同胞的生命健康，而且使尚未完全擺脫亞洲金融危機影響的香港經濟雪上加霜，通貨緊縮，市場蕭條，失業率上升至8.7%。為保障香港同胞生命安全，幫助香港經濟走出低迷，中央政府及時伸出援助之手。在內地同樣急需抗疫醫藥物資的情況下，中央政府無償向香港提供大批抗疫藥品和器材。國家領導人親赴香港疫情重災區和醫院視察慰問。當年6月29日，內地與香港簽署《內地與香港關於建立更緊密經貿關系的安排》（CEPA），確定了兩地在貨物貿易、服務貿易和貿易投資便利化三個領域的開放措施和實施目標。隨後又實施內地居民赴香港“個人遊”政策。這些都為香港擺脫非典沖擊、恢復覆經濟增長註入“強心劑”。」
－《一國兩制白皮書》10/6/2014
**************
PS：
張德江2011年時任國務院副總理，分管安全，有份處理溫州動車追撞事故，喺未救晒人之時，有人曾要求「抓緊清理現場，盡快恢復通車」，對人命有幾「重視」，相信大家仲記憶猶新。
正所謂崩口人忌崩口碗，領導今次訪港，相信一定唔會敢到高鐵同醫院視察，以免斷正沙士同動車相撞之大忌，去吓新落成公屋，風花雪月咪幾好。
（原文載於作者facebook專頁。文章為作者觀點，不代表《明報》立場）