公民黨楊岳橋之前收到11蚊帛金，抬頭寫住寄畀「廢青楊岳橋」；點知楊岳橋今朝喺facebook話又收到帛金，不過今次其實只係「扮帛金」，係楊嘅支持者同義工團用白信封包住嘅捐款。
其他報道：【消委會】終止寬頻程序繁複 搬屋改新約遭收2份月費
楊岳橋話「一早返工收到成堆扮帛金2.0」，5封「扮帛金」，抬頭分別係「肥仔楊岳橋」、「茂利楊岳橋」，仲有各式圖案嘅郵票，例如楊岳橋大頭、whatsapp公仔等等。楊岳橋話收到呢啲信真係令小秘書嘅Monday blue(星期一憂鬱)一掃而空，會馬上安排送上「This AY糖」。
帛金事件回帶，話說今個月初立法會審議撥款條例草案時，民建聯蔣麗芸詛咒建議削減消防處開支嘅人民力量陳志全「殉職」，楊岳橋就話議事堂百無禁忌，仲叫蔣麗芸畀帛金。之後，楊岳橋辦公室就收到11蚊帛金，不過楊岳橋無「嬲豬」，仲叫寄信畀佢嗰位仁兄去立法會拎返包「This AY」糖做「回禮」。
相關字詞﹕編輯推介