立法會日前審議《2016年撥款條例草案》時，民建聯蔣麗芸詛咒建議削減消防處開支嘅人民力量陳志全「殉職」，公民黨楊岳橋就話議事堂百無禁忌，仲叫蔣麗芸畀帛金。楊岳橋今日就喺facebook大爆，自己真係收到11蚊帛金，不過佢就一於以幽默化解惡意。
其他報道：【Emily online】被翻前年無投票舊帳 工聯會新海報撐7天侍產假 王國興、郭偉強抱B廣告被指「HEHE」
從相片可見，白色信封上寫明係寄畀「廢青楊岳橋」，仲話「付你一生一世」同埋「多付一元望你們陰間坐牢順利，直達地獄」；帛金除咗畀楊岳橋外，仲畀埋佢「長輩父母妻子女親朋戚友朋黨黨朋友」，至於署名就係「香港市民鞠躬」。
楊岳橋發揮幽默本色，話「睇嚟呢位仁兄好留意我嘅議會發言」，知道他百無禁忌唔介意收，「最好就早啲畀，畀多啲，年年畀，月月畀」。
不過身為大狀嘅佢溫馨提示對方：「寄現金就犯法嘅，下次都係寄支票啦，抬頭寫公民黨 is ok」，仲話拆信封時「傑哥」梁家傑都喺度，於是建議分一半，即係5毫半子畀佢，不過佢話「唔好啦，畀公民黨啦」，為黨籌錢真係不遺餘力，文末仲貼埋條捐款link添。
網民留言揶揄寄件人做法「小學鷄」，反問「律師都係廢青，香港仲有邊個唔廢？」有人就問「佢唔寫自己地址，粒糖點比（畀）佢？」不過有人就認為對方係「曲線」做榜樣撐公民黨：「全香港7百幾萬人，一人畀$11捐畀公民黨，有成8千萬，公民黨就發喇，選立法會經費就唔駛擔心。」
相關字詞﹕Emily Online 蔣麗芸 楊岳橋 熱話