店舖有名人「加持」往往會生意大增,喺灣仔售賣動漫模型嘅鴻興玩具店,上年就有金像影帝尼古拉斯基治(Nicolas Cage)幫襯,霎時爆紅,咁啱商務及經濟局長蘇錦樑噚日又去到舖頭幫襯,老闆仲影埋相放上facebook做宣傳,點知弄巧反拙,吸咗好多個「嬲嬲豬」,有網民仲話唔會再幫襯添,搞到老闆最後要急急刪除晒啲相,認真係「關公災難」。
玩具店噚日放咗3張相上fb,話係「蘇局長親力親為介紹香港特色」,仲畀咗3個手指公佢。相中可見,蘇局長手上拎住模型公仔端詳,又同老闆娘齊齊笑住合照,非常開心。
原本諗住搵局長幫手宣傳吓,點知網民唔只完全唔受落,仲嬲到爆,留言問「係未(咪)即係叫我以後5(唔)好嚟」。見到局長咁趕客,玩具店即刻刪晒啲相,費事影響生意吖嘛。