被形容為「西環契仔」嘅立法會議員謝偉俊（Paul），早前被發現噝九東一帶掛出橫額，寫住「香港須改，特首要變」，引起唔少揣測。不過，有消息話，阿Paul受到來自西環嘅壓力，banner最近已經換走。Emily即刻關心吓佢係咪受壓，佢就話大家都係畀意見佢，如果客觀、包容啲去諗，就唔係受壓喎。
Paul之前掛出嘅banner寫住「香港須改，特首要變」，有人認為係指要變走特首，亦有人話特首作風要變。喺《信報》撰寫政情專欄嘅余錦賢收到風，話金鐘添馬有人好唔開心，結果西環施壓，要Paul換走張banner。
余錦賢求證後，阿Paul就話近日各方面都有畀意見佢，有人認為banner字眼敏感，有民調反映特首支持度唔係咁差，咁啱佢有新嘢想講，所以換咗新banner。
其他報道：【毓民擲杯案】黃定光作供指立會上睡覺「人之常情」 稱「作睡覺狀」抗議拉布 否認憎黃毓民
Emily都問過阿Paul係咪受壓，佢就話「唔係咩壓力」，而係收到好多意見，希望宣傳方面可以改變吓。Emily再追問，咁西環嘅人有冇畀過意見，佢就話「左中右都有，街坊都有畀意見」，又話係咪受壓要視乎唔同人意見，「如果可以客觀、包容啲去諗就唔係受壓」。