青年民建聯主席顏汶羽今早以「不明不白」為題喺佢個Facebook撰文，身兼觀塘區區議員嘅佢話，入伙6年幾嘅彩福邨，因為屋苑本身嘅設計問題，亦加上清潔公司管理不善，令到佢地嘅衛生問題一直都「不明不白」，而早前間公司換咗新主管後，終於可以坐低大家傾吓個問題，新主管亦有管理屋苑嘅經驗，所以深明大義，知道再唔搞好衛生問題居民都會好困擾，終於係呢幾日做咗前所未有嘅清潔，令到彩福邨「重見天日」。
顏汶羽話畀Emily知，彩福邨本身係以居屋設計，後來又以公屋分租，一層有24戶人咁多，但垃圾房又好鬼細，唔夠裝，本身已經有先天設計問題，再加上後天管理不善，佢話以前個清潔公司連人都請唔夠，根本處理唔到咁多問題，令到個衛生情況「好唔掂」，所以6年嚟都有唔少居民批評呢個問題，佢自己都喺facebook話，「是清潔公司問題，是房署問題，也是我的問題」。
不過佢話好彩清潔公司請咗個新主管，而且新主管係有管理屋苑嘅經驗，仲話對方了解咗個問題，仲立即解決，所以呢幾日見到清潔工人第一次用水喉清洗樓層走廊，佢仲好開心咁話，「今後，我要彩福邨重見天日，而非不明不白！
相關字詞﹕編輯推介 emily online 顏汶羽 不明不白