即時港聞

【Emily Online】測試微軟AI讀相功能:王振民演講喊緊?陳太刷緊牙? (21:14)

今日會展舉行政府主辦嘅首屆「互聯網經濟峰會」,邀請咗業界例如微軟、facebook、小米等等講者演講,其中微軟公司代表講到人工智能(AI),介紹咗一個叫CaptionBot嘅新功能,只要你提供一張相,等大概5秒左右,電腦就會估出相中意思,幫張相寫一句圖片說明。

Emily見咁得意,就即刻交幾張相試試佢啦!Emily上載咗特首梁振英嘅相,圖中佢發表演講啱啱扁起個嘴,CaptionBot就話「I think it's a man in a suit and tie and he seems :|(表情符號:目無表情)」,形容有一個著西裝打呔嘅男人,表情就用emoji嚟表達,都算係貼切啦。

其他報道:被「屈」支持開紅燈區? 姚思榮苦笑:我都唔明呀

Emily又試吓另一張噚日中聯辦法律部部長王振民喺午餐會演講嘅相,又係咁啱影到佢扁起個嘴,CaptionBot就話「I am not really confident, but i think it's a man in a suit standing in front of a box and he seems T_T(表情符號:哭)」,電腦表示唔太肯定,相信係一個著西裝嘅男人企喺一個盒前,好似喊緊口,Emily就笑咗出嚟,王部長當時只係表情嚴肅,無流眼淚喎!

另一張測試陳方安生相片,陳太講到興起見到佢棚靚牙,隻手剛好放咗喺胸口前,CaptionBot測出:「I am not really confident, but i think it's person brushing the teeth and she seems :D(表情符號:露齒笑)」,Emily真係估唔到,電腦會形容陳太好似刷緊牙露齒笑咁,呢次真係唔太準確喇!

其他報道:容許學生赤腳上課獲家長讚好 校長:體貼孩子需要

Emily仲試咗其他動物、食物相片,大致上都形容到圖中影像,但係人物相片結果就比較出人意表,睇嚟AI嘅認人技巧,仍然有待改進呢!

其實除咗微軟,facebook早前亦公布將會推出相片聲音描述功能,希望可以為視障人士將圖片解碼。微軟CaptionBot用文字形容,facebook呢個功能就會讀出圖片內容,方便視障者,facebook話,呢套技術仍處於早期開發階段,但已經可以識別出不同範疇,如交通、大自然、體育、食物,仲可識別人嘅微笑同自拍照等。

大家都可以試吓:https://www.captionbot.ai

其他報道:僅發黃雨警告惹爭議 市民:海底奇兵咁都只黃雨?

其他報道:內地航空公司抽CY水? 醒目網民質疑有人改圖

相關字詞﹕科技 微軟 編輯推介

上 / 下一篇新聞