行政會議成員、新民黨主席葉劉淑儀之前就約見「香港民族黨」及8間大學學生會，希望了解年輕人對本土同港獨思潮嘅睇法，不過最後都食晒檸檬。今日佢就上咗DBC節目，可以近距離同青年新政發言人黃俊傑交流，仲有香港眾志副秘書長周庭添。Emily諗住葉太實會同兩位年輕人好多火花，點知葉太竟然多謝黃俊傑喎！
葉太係節目中講到內地嘅系統、文化等等同香港唔同，可能有人做咗人大代表後，有啲嘢知道係唔講得，不過都會透過唔同渠道，私底下向中央表達意見，但年輕人可能唔太知道情況，就以為政府聽唔到佢咃嘅聲音，所以要多啲同年輕人見下面、溝通。
佢之後就話，好多謝黃俊傑，「佢唔嫌棄我」，多謝佢畀面一齊出席節目，又話「冇當我係匪類」。點解佢咁講？葉太早前邀請8大學生會見面時，樹仁大學學生會就係Facebook拒絕邀請，「多謝邀請，我們婉拒。#勿通匪類」，睇嚟葉太對呢個「Hashtag」有啲耿耿於懷喎。
葉太又鼓勵黃俊傑同佢哋嘅團隊，積極參選入議會，「從正當合法途徑參與係好事」，又認為係「新舊交替」。
黃俊傑就回應話，喺某啲議題上，「從來都open（交流）」，就好似「網絡23條」嗰時都約過葉太，但就冇回應，又話佢地而家就行緊「進入議會的路線」。
相關字詞﹕編輯推介