戲院、劇場不時有人投訴，話有觀眾睇戲時唔熄手機鈴聲，或者掛住玩電話，形容係「劣質觀眾」喎！不過體育、演藝、文化及出版界功能組別議員馬逢國，就畀人話佢出席講座時手機響，仲不停撳電話。馬逢國同Emily講，唔認為咁樣係唔尊重講者嘅表現，話現場好多人都係咁，只要唔干擾到講者就得。
其他報道：馬逢國談十年：學生冇科5名以內，最後全級第一，點解呢？
有讀者同Emily講，佢噚日喺演藝學院出席「我們都是藝術公民」講座時，見到馬逢國到場聽講座，點知突然聽到佢手機發出「輕快音樂」。有啲觀眾即刻望向馬逢國嘅方向，見到佢快手熄聲，並冇道歉，但之後成場講座都喺度撳電話，嗰位讀者仲見到佢好似玩緊城堡攻打類嘅遊戲。
Emily向馬逢國求證時，佢就話自己當時喺講座上用電話做過好多嘢，好似send whatsapp、email，唔太記得有冇玩手機遊戲，但強調自己都係聽緊講者講嘢。
佢又話唔認為撳電話係唔尊重講者嘅行為，因為眼見現場好多人都有撳電話，「只要我唔干擾到佢（講者）就得」。
問到點解聽講座都唔較靜音，佢就話因為之前有人send咗段聲音檔案畀佢，可能聽完之後唔記得熄聲。馬逢國亦話一般睇戲、聽講座時都唔會唔記得熄聲，但偶然都會大頭蝦，「手機好多時有唔同用途，有時有人send sound file（聲音檔）、影片，一下子唔記得熄」。
「我們都是藝術公民」講座主要係講藝發局、藝術界功能組別嘅運作，馬逢國話見業界有個咁嘅公開活動，到場主要係想了解吓大家有咩意見。
【畀獎金】有員工指，有做了40年的南早員工獲1.5萬，其忠誠度每年值375元。 報道：http://bit.ly/1VDgn2z【港獨爭拗】王振民：大範圍談論宣揚港獨是犯煽動罪http://bit.ly/1VDgQ4V【online...Posted by 明報即時新聞 on Friday, 8 April 2016