創新及科技局長楊偉雄早前同特首梁振英去咗一個創科論壇，同年輕科技企業家交流，期間佢嘅一句「有邊個見過Steve Jobs？未呀？我見過！我真係見過﹗」令佢成為網絡紅人，但究竟局長係咪真係見過呢？幾時見過呢？呢個謎底今日終於揭開啦，兩人原來係識於微時！
楊偉雄今日下晝出席立法會財委會特別會議，講解創科局政策，民主黨立法會議員單仲偕問問題時重提「Steve Jobs」舊事，話知道局長真係見過Steve Jobs，佢自己都見過㗎，不過係睇戲嗰陣。
楊偉雄即時話自己喺1977年4月17日見過Steve Jobs，當時對方22歲，仲未成名，「我記得（當時）佢講過嘅嘢，所以先（喺論壇）講出來，我唔係佢成名先見佢。」
局長唔單止記得邊年邊月邊日見過Steve Jobs，仲記得原來今日係佢上任4個月零17日嘅大日子，又話創科局下星期會推出facebook宣傳，叫議員要畀多啲批評喎。
Uber嘅營運模式在港唔合法，楊偉雄被公民黨議員楊岳橋問及，佢自己都曾經公開讚過Uber嘅營運模式，咁創科局日後點防範創意嘅營運模式唔會喺香港犯法呢？局長嘅超強記憶力又再一次發揮啦，佢話自己好記得佢嗰次除咗讚Uber嘅營運模式，仲提到每個企業都要有社會責任，包括合乎當地法例，「可能傳媒冇寫（呢句）出嚟啦。」
其他報道：【特首特辦？】梁唐青儀梁頌昕：行李經安檢後送回 無用特權或施壓
【開腔！】詳情：http://bit.ly/20a8dzz【特首特辦？】梁振英聲明稱無用特權 未交代女兒行李是否免安檢送到禁區http://bit.ly/20a5ZQI【特首特辦？】政府消息人士：梁振英從未接觸機管局 否認說「叫我...Posted by 明報即時新聞 on Thursday, April 7, 2016