獨立電影《十年》昨晚獲頒金像獎最佳電影，資深電影人黃百鳴直言是「笑話」、「極大錯誤」，對結果感愕然。他認為《十年》奪獎會令香港電影倒退十年，「以後香港電影無準則，不如我拍個尖銳啲嘅題材，我就攞最佳電影，我使乜要咁畀心機去做好一部電影？以後香港電影仲點會進步？」
相關報道：林建岳指《十年》得獎是香港電影界的不幸 稱政治綁架了專業
他認為電影是綜合藝術，最佳電影應頒予各個崗位，包括導演、演員、燈光、攝影等均有高水準的作品，「如果你覺得（《十年》）題材係新穎，創意係好，咪畀個最佳劇本囉，你唔可以畀個最佳電影佢」。他質疑《十年》不能代表2015年的香港電影，「香港電影仲要行出外面，要畀人睇，你代表2015年嘅最佳電影，去畀外國人一睇，吓？咁㗎？咩嚟㗎？甩甩漏漏咁」。
不過，到底《十年》有何甩漏？黃百鳴坦言自己未看過該片，「老實講我無睇過呢套戲，但我覺得佢50萬可以拍到識飛嘅呢，我都服咗佢」。
黃百鳴是《葉問3》的監製兼出品人，該片有份角逐今屆最佳電影。他說，因前作《葉問》已得過最佳電影，「唔會套套都畀你」，故事前已認為再奪獎機會不大，不抱很大希望，「亦唔係話食唔到嘅葡萄就酸，唔係嗰樣嘢」。他說，《十年》是低成本製作，未獲其他項目提名，從專業角度「唔係攞最佳電影」。若其他提名電影獲獎，他覺得合理。
相關字詞﹕編輯推介