政府提出改革醫委會，建議增加4名業外委員，令選舉委員同委任委員比例，由現時14:14，改為14:18，但惹來醫學界反彈，連醫學生都關注。港大醫學會今晚舉辦醫委會改革論壇，座上嘉賓、醫委會委員蔡堅就話，按政府方案修例後，政府就有權委任過半數成員，堅持呢個做法只會令政府同業界對抗，製造憤恨，佢仲反駁政府提出加委員係為咗加快審訊，但事實係唔會有此結果，「如果真係得，我唔做醫委會或者醫學會」。
同場嘅食衛局醫療規劃及發展統籌處處長孫玉菡就「拍心口」話，即使加委任委員，都無打算干預醫委會政策，更無意取消海外醫生考試，呢個只係「形式上嘅委任」，仲話組成人數係技術問題，唔係寸步不讓。佢仲話，醫生喺一份神聖工作，社會賦予好高期望，強調從來唔希望有任何對立，而家只係講信任問題。
不過，佢呢番說辭就得唔到台下醫學生信任，有學生質疑點解討論政策係講信任而唔係講原則，又話「醫生好神聖」比較似宣傳口吻，不如多交代點樣解決委員人數分配。孫玉菡聽到後就忍唔住講咗句「我只係一個公僕」，強調自己「真心講醫生係神聖」咁話。
人數之爭鬧成僵局，醫委會何栢良就向立法會提出新招「加4減2加2」方案，即係照加4個業外委員，但將2名醫學專科學院提名嘅委任醫生委員，改由直選產生，咁就可以順得哥情又得嫂意，既能增加業外委員比例，又可維持醫學界要求嘅委任同選舉1:1比例，唔知政府考唔考慮呢？
【被代言事件】Jini Bakery負責人在fb向河國榮發出公開信，稱自己也在事件中被欺騙，邀請河一同前往報案，以讓警方繼續跟進。報道： http://bit.ly/1UuZXuh【被代言？】河國榮收2000元車馬費 曲奇店：有人代河...Posted by 明報即時新聞 on Thursday, March 31, 2016
相關字詞﹕醫委會