社民連梁國雄（長毛）嚟緊星期日迎來60大壽，一班好友為賀佢生日，除咗秘密用超過一年籌備新書《我反抗故我在》同搞神秘生日派對之外，仲搵來各位政界好友拍片為佢祝壽。唔少人都勸佢為健康著想，唔好再食煙飲酒，鈺成兄仲叫佢戒埋拉布同勞氣！
為賀長毛60大壽，一班好友搵來立法會主席曾鈺成、學民思潮黃之鋒、自由黨田北俊等人拍片為佢祝壽。曾主席笑到見牙唔見眼，對住鏡頭講「長毛，六張嘢啦喎，食煙、拉布、勞氣都係傷身嘅，戒晒佢啦」。
向來鐘意抽水嘅田大少都不忘笑吓長毛，雖然田少今年已經69歲，但都對住鏡頭話「好多朋友喺街度見到我（田少）同你（長毛）呀，覺得你殘過我喎」。抽水之餘，佢都不忘關心長毛身體，「拉布可以繼續拉布，掟嘢可以掟嘢，但食煙真係危害健康架」。
田少仲喺製作花絮講起，有次長毛問佢一隻蕉幾錢，田少答一兩蚊啦，點知長毛竟然對佢話「你就唔知民間疾苦啦，蕉呢唔係一隻隻，係一梳梳（賣）」。田少心諗，真係俾長毛考起呀。
雖然好多人都勸長毛戒煙酒，但同屬社民連、有份籌備生日大禮嘅黃浩銘就力撐長毛，話雖然佢地係善意，但叫長毛戒煙酒係唔啱嘅，「我就叫你繼續食煙，繼續飲酒，希望你有個輕鬆嘅人生」。
【有片睇：網民質疑係私刑？】警方指有藥房職員報案指有人偷貨。短片＋詳情：http://bit.ly/1VMvO97【短片：Emily Online】長毛60大壽 好友製作新書紀錄廿年抗爭 曾主席披露寫詩往還...Posted by 明報即時新聞 on Friday, 25 March 2016