即時港聞

【Emily Online之撐港足】特首財爺FB談港足 Like數嬲數差天共地 (13:18)

港足今日凌晨喺世界盃亞洲區外圍賽次圈最後一戰,作客卡塔爾02飲恨,無緣出線第3圈。雖然特首梁振英同財政司長曾俊華都喺FBpost,但網民反應可以話係差天共地。

梁振英凌晨2點幾出post,話自己喺博鰲亞洲論壇開完會之後,已經冇晒航班返香港,最終返到禮賓府只係夠睇賽事最後8分鐘。佢話港隊最後輸02,可以話係雖敗猶榮,仲影咗個足球話係當年喺港隊籌款晚宴拍賣得來。

不過網民似乎唔多受落,直至下晝約1點,已經有2.4萬網民畀「嬲嬲」,佔整體超過九成,只得唔到1300人「讚好」。因為唔係朋友冇得留言,唔少人分享回應「對中國隊果(嗰)時你又唔出聲支持」、「又嚟呃嬲」,有人翻舊帳引述佢前年話「體育界對香港冇經濟貢獻」,又笑佢連影張相都失焦(out of focus)。

另一邊廂,曾俊華又係凌晨2點幾喺FB分享港隊不敵卡塔爾嘅新聞,用英文寫「為港隊感自豪!球員意志驚人!(Proud of the Hong Kong team! Amazing fighting spirits!)」

網民嘅反應就相當正面,同樣截至下晝1點左右,有超過4000人「讚好」,佔整體超過九成,相反,只得1個人畀「嬲嬲」。唔少人都留言話港隊表現出色。

Emily只好講句,同人唔同命啦。

【繼續支持】陳七期望港足重新出發!報道:http://bit.ly/1Rp36Wx【港足負卡塔爾出局 梁振英:雖敗猶榮】http://bit.ly/1Uolk0p【港足2球負卡塔爾世盃出局 鬥志贏掌聲寄望亞洲盃】...

Posted by 明報即時新聞 on Thursday, 24 March 2016

相關字詞﹕香港勁揪 編輯推介

上 / 下一篇新聞