民主黨何俊仁曾在立法會開會期間睇性感女郎照片，引起軒然大波，兩會正喺北京召開，港區政協小組會議，正流傳有政協委員開會期間睇色情片。Emily聽聞，早幾日有港區政協委員開緊閉門小組會議時，某位男政協委員手機突然發出奇怪聲響，在場人士都覺奇怪，而坐喺附近一位女政協委員，就發現該名男政協竟然睇緊鹹片，隨即嚴正批評佢「係對女性一個侮辱」。
傳聞中嘅男主角，就係廣東社團總會榮譽主席王國強，事件已傳遍政協圈子，有人形容人不可貌相，亦有人笑言唔同政協委員都有唔同嗜好喎。
Emily唔知呢個傳聞有幾真，今日向王國強求證，佢回應話自己開會係睇政協提案嘅嘢，被問到係咪手機發出聲響，佢就話有短訊彈咗出嚟後佢已熄咗，否認自己睇色情片；對於係咪有其他政協委員立即表達不滿，佢就話聽唔到。
王國強之後再向Emily主動澄清，話自己係被人針對，先有咁嘅謠言，形容「關公都有對頭人」，慨嘆點解建制派要自己人打自己人。咁究竟點解佢手機會發出奇怪聲響？王國強話佢個手機成日都有奇怪嘢彈出嚟，但又唔係好識點熄咗佢，強調如果要睇色情片又點會喺大庭廣眾睇呢？係都返房先睇啦。
Emily提出希望王國強可以開番相關聲音，證明唔係傳聞所指睇色情片，但王國強就話雖然可以拎出嚟以正視聽，但就覺得無必要咁做。
掌握最新消息，請Like「明報即時新聞」fb專頁！ http://www.facebook.com/mingpaoinews
【識睇梗係睇留言】如果明報有個私人泳池，小編都會諗下嘅……報道：http://bit.ly/1WaHIYg【BBC指梁振英建議被嘲弄】http://bit.ly/1YzL6O7【中環設釣魚區 梁振英指上班族午餐後可鬆弛 冀IFC建...Posted by Mingpao Investigative Team on Wednesday, 9 March 2016