一田百貨行政總裁莊偉忠日前突然辭職，去向引起各界關注，他周六(5日)晚在個人facebook專頁發文，回應外界查詢，文章引起網友瘋傳，莊偉忠昨深夜在再鋪文讚網友「可愛」，但明白剎那光輝不是永恆，「唔識見好即收，畀人留個美好印象，結果晚節不保，衰收尾，無人可憐」。他又說「名利虛榮」和「廢人廢話」只是過眼雲煙，不會放在眼內，所以非常快樂，更不枉此生。
莊偉忠上載fb專頁的「分析圖片」，顯示他於上周六發表的文章「已經66萬Reach，26,000Reaction，1800些牙，500留言」，令他不禁大呼「實在太誇啦，大家對我實在太好啦」，但就搞笑地回應部分留言：「我都未瓜，就叫我一路好走。我要退休，就祝我前程錦繡。我落山坡，就望我再創高峰。我仲未傻，就想我挽救亞視。」他大讚網友「可愛」，但他說，無論文章反應多熱烈都不會飄飄然，因為「剎那光輝不是永恆」，又說連維園阿伯都知道「亞視唔會永恆」，「我咁sharp醒，點會唔明」。他又公開在私人fb的留言，提到看了幾百個留言很感動：「我想喊」。
他說，專頁昨天(7日)已大致恢復平靜，「聽日會仲靜」，又從事件中領悟到「個個腦細戀棧權位，驚死無得前呼後擁，無得享受領袖光環」，但他認為「唔識見好即收，畀人留個美好印象，結果晚節不保，衰收尾，無人可憐」。他說，若過不到名利虛榮一關，做人不會開心，「聽廢人講廢話……根本嘥時間」，做人亦不會快樂，而他「名利虛榮，廢人廢話，全部過眼雲煙，閒過立秋，唔會放在眼內」，所以非常快樂。
他又感謝網友的支持、讚賞，私下亦收到很多工作邀請，他說「需要時間度度，滿足老婆大人吩咐：『可以退休，唔可以唔做嘢。』」更說「做人做到咁，我不枉此生」。
莊偉忠fb全文：
「一路好走」
辭職唞唞，告老返鄉下耕田，攪到咁多人擔心同埋關心，有啲唔好意思，所以上星期六，寫咗篇簡單回應，點知網上傳得仲癲，到𠵱家為止，已經66萬Reach，26000Reaction，1800些牙，500留言，實在太誇啦，大家對我實在太好啦。但係 ...
我都未瓜，就叫我一路好走。
我要退休，就祝我前程錦繡。
我落山坡，就望我再創高峰。
我仲未傻，就想我挽救亞視。
你哋實在太可愛啦，但無論反應熱烈成點，自己唔會飄飄然，蔡楓華都識講：「剎那光輝不是永恆」，維園阿伯都知：「亞視唔會永恆」，我咁sharp醒，點會唔明。
噚日係私人面書咁講：
鞠躬盡瘁，功成身退。
知所進退，需要大智慧，但我唔使，話退就退。
常人嘅下坡路難行，我話行就行，人往低處走。
畢生追求快樂，隨遇而安，只向前，從不回望。
有本事，就睇幾百個留言，睇完唔感動，好難。
我想喊。
今日專頁已經大致恢復平靜，聽日會仲靜，後日更加靜。如果唔係，點解個個腦細戀棧權位，驚死無得前呼後擁，無得享受領袖光環，無得指點江山。唔識見好即收，畀人留個美好印象，結果晚節不保，衰收尾，無人可憐。
過唔到名利虛榮關，做人唔會快樂。成日聽啲廢人講廢話，夏蟲語冰，對牛彈琴，根本嘥時間，做人又點會快樂。感謝上蒼，名利虛榮，廢人廢話，全部過眼雲煙，閒過立秋，唔會放在眼內，所以我非常快樂。
傻人有傻福，好人有好報，呢兩日收到好多支持讚賞問候，私底下收到好多工作請求，我需要時間度度，滿足老婆大人吩咐：「可以退休，唔可以唔做嘢。」
做人做到咁，我不枉此生。如果今晩有人代我洗碗洗衫，但覺此生無憾。
後記：專頁「分析圖片」，畀大家𥄫𥄫。
掌握最新消息，請Like「明報即時新聞」fb專頁！ http://www.facebook.com/mingpaoinews
【搞乜呀？】亞視股東代表何子慧今早突現身高院，但拒絕回應到法院的目的，只稱「畀咗應該畀嘅錢」，但拒絕透露金額，只稱稍後會召開記者會交代事件。報道﹕http://bit.ly/1nsDuPP【亞視停播倒數】中國文化將向法院申請終止德勤作臨...Posted by 明報即時新聞 on Monday, 7 March 2016