亞視究竟幾時熄機？或者最終會唔會熄機？Emily同埋好多行家都覺得好頭痕，但原來警隊呢幾日都有睇實亞視幾時熄機，皆因亞視係咪永恆，原來對警隊都有影響。
無他，原來因為《警訊》近期編排左喺亞視播放，例如原定今晚7點播放嗰集，就係講打擊清洗黑錢。Emily聽聞，警隊中人下午唔知亞記會唔會熄機，決定喺大約6點，以【警訊永恒】呢個tag，將新一集《警訊》放咗喺警隊facebook出街，以便巿民可以睇到。最終，亞視6點無熄機，呢集警訊係7點順利喺免費電視台播出。
其實，《警訊》定時喺無綫及亞視播放，每個電視台播完10幾集，就會放喺另一個台續播，呢期湊巧喺亞視播放，熄唔熄機梗係好大影響啦。今集出到街，而剩低喺亞視播嘅《警訊》又點算？Emily聽講警方都係好似普羅巿民咁，觀望多陣再處理，因為亞視幾時「真‧熄機」，呢一刻仲係猜唔透。
掌握最新消息，請Like「明報即時新聞」fb專頁！http://www.facebook.com/mingpaoinews
相關字詞﹕Emily Online 亞視停播倒數 警察