繼財爺曾俊華喺財政預算案,引用歌曲《憑着愛》歌詞談本土,政壇出現一股「唱歌仔」嘅風氣。立法會下午繼續審議《版權修訂條例草案》,新民黨田北辰就唱咗許冠傑兩句《浪子心聲》:「命裏有時終須有,命裏無時莫強求」。佢話,版權修訂條例對有建設性發揚本土意識絕對有幫助。
佢話,本地人創作嘅音樂就係本地傳統同價值最好嘅載體,70、80年代本地音樂將香港介紹畀世界。佢話嗰段時間自己「捱緊世界」,每當低落時就諗起許冠傑兩句歌,並即席唱起「命裏有時終須有,命裏無時莫強求」。
佢話,每次唱完都充滿正能量,「有乜睇唔開,好無癮,呢兩句唔錯架」。田北辰亦話,創意產業係重要嘅本土經濟,可以畀年輕人向上流嘅機會,所以不能成功立法,版權持有人、創意工作者、本土派同政府係「四輸」。
田北辰早前亦曾喺立法會憑歌寄意,唱出Bob Dylan《Blowin' In The Wind》入面嘅「How many times can a man turn his head, and pretending that he just doesn't see?(多少次轉過頭去假裝看不見)」,問特首梁振英對社會不滿係咪可以當睇唔到。
掌握最新消息,請Like「明報即時新聞」fb專頁! http://www.facebook.com/mingpaoinews