俗稱「網絡23條」的版權條例草案今日恢復審議,政府已一早預告,如果星期五前完成唔到,會「就此作罷」。
早前商務及經濟發展局長蘇錦樑開會帶咗蛋撻、叉燒慰問議員,為大家打氣,不過人民力量「大嚿」陳偉業就笑言「太cheap」,話自己最鍾意食cheese cake。唔知係咪因為咁,局長今日「加碼」,請大家食政界聞名的「蘇氏芝士蛋糕」。陳偉業話,「可能局長知道今日最後一日,臨別秋波請大家食返餐好嘅」。
蘇局長仲親自拎咗兩個蛋糕俾一眾傳媒分享,Emily問蘇錦樑:「係唔係蘇太整架?」蘇錦樑笑答:「我屋企整嘅,蘇太監製囉」,出自蘇太嘅recipe(食譜)。不過行家發揮專業精神,全部相機食先。蘇錦樑無奈笑說:「蛋糕唔係用嚟影相,係用嚟食嘅」,又慰問行家話:「大家辛苦咗咁多個禮拜,今個禮拜應該係最後一個星期,所以慰勞大家,隨便享用啦。」大家就吃得好滋味啦,不過局長就無口福,原來佢唔食得芝士蛋糕,唔受得奶酪食品。
掌握最新消息,請Like「明報即時新聞」fb專頁 ! http://www.facebook.com/mingpaoinews