財政司長曾俊華噚日發表最新一份財政預算案，財爺喺預算案中大談真本土，又注資2000萬推廣港產片，結語時更借80年代歌曲《憑着愛》寄語港人搵出路，市民同議員嘅評價都唔錯。財爺今日再去立法會回應議員提問，社民連長毛梁國雄一如以往，開會時擅自離座，走到財爺面前遞上示威品，但財爺呢次唔單止冇叫長毛「過主」，仲當面讚長毛「你啲手工真係做得愈嚟愈好」，睇嚟心情大靚。
財爺今朝早到立法會財委會就預算案回應議員提問，大部分議員都讚佢份預算案嘅引言同結語。公民黨郭家麒話要「恭喜」財爺，形容預算案「比(特首)梁振英高好多皮」，識得提到facebook、港隊世界盃外圍賽等等，但「梁振英連提一提都唔夠膽」。
自由黨田北俊亦話預算案「啱聽」，仲話自己噚日喺facebook中話對預算案「收貨」，都有千幾個like。
答問期間，長毛突然攞住有曾俊華個樣、天秤形嘅示威品走到財爺面前，財爺欣然收下，仲笑住話「你D手工真係做得愈嚟愈好」。之後，人民力量陳志全發言時又再提起，話預算案其實無新意，但即時民調係歷年最高分，議員都無激烈反應，而長毛只係放低示威品。佢話，「香港人唔係咁難管治，賣下口乖都受」，新民黨葉劉淑儀就加口話「好受氹」。
財爺回應時就再讚長毛，話長毛嘅手工確實係進步左，「唔錯唔錯」，仲形容係「藝術品」，「雖然未入得M+，可以慢慢繼續努力啦」。
掌握最新消息，請Like「明報即時新聞」fb專頁！ http://www.facebook.com/mingpaoinews
【民間智慧】選/不選？做/不做？周太認為，都不是曾俊華個人的意志可以決定。報道：http://bit.ly/1VFMOvk【不怕被指本土分離主義？曾俊華：有本土情懷是當然事】http://bit.ly/1WK76nE【聽眾指地理環境...Posted by 明報即時新聞 on 2016年2月24日